E Frog: wie gohts nach dr Schuel wyter? E Lehr mache oder ins Gymi, was isch gschyter? Es git söttigi, wo säge: worum söll ich go schaffe? Ich cha jo dr ganz Dag ins Händy gaffe. S git die, wo säge: Ich bruch nit vill, will ich au nit vill mache will! Es git die, wo uf d Zähn tüent bisse, wo sich bi Schwierigkeite zämme risse. Vergässe mir nit die, wo wei wyter cho und nach dr Schuel ine Lehr wänd go. Drum tue Di informiere bi Dim Verband, do kriegsch Infos vom Bruef us 1. Hand. Erfahrsch, was lauft in dere Branche öb Schriner, Fahrzüg, IT, etc: in jeder Tranche. Hesch es Problem oder weisch nit wyter?

Min Tip: tues woge tue dr Lehrmeischter, Lehrer oder dr Vorschtand froge Über 10 Johr ha ich dr 2-Rad-Schtand a dr Bruefsschau gmacht berotet zämme mit AZUBis, mit Schüeler und Lehrer glacht. Was wöttsch lehre, tue Di rächtzytig informiere und bim Schnuppere d Arbet denn usprobiere. Doch langsam gohts Handwärk irgendwie verlore. Villicht, will die künschtlichi Intelligänz isch gebore? Und jo, ich weiss, d Zyt tuet rase und mir ghöre scho zu de alte Hase. Aber gliech dörf me nit vergässe, wer cha sich mit eusere Erfahrig mässe? Früehner isch nit alles gsi verchert, denn us eusne Fehler hett me au glehrt. Lehr eifach öppis, egal was Du machsch. Dänk dra, was Du chönnsch, das chasch. Befass Di lieber z früeh als z schpoht wie, was, wo, im interessierte Bruef goht. Gang uf d Arbet mit eme Lächle im Gsicht will das bi de Lüt es Vertraue verschpricht. Dänk dra, so leggsch e Grundschtei im Läbe und mit eme Handwärksbruef bisch nie drnäbe.

Mis Fazit: Tatsach isch uf dere Wält, es goht leider nit ohni Gäld. Vill Glück!

ERIKA HUGENTOBLER-LÜTZELSCHWAB, MAGDEN